اوره گیم دولودو یاغا بیلمیرم

گوروللور بُغُض لار یاتا بیلمیرم

یاندیریر دیلیمی چوخ دردلی سوزلر

 گلیرم یازماغا      یازا بیلمیرم

 

 


باغلاردا یوخدی ، قدیم گوزللیک

سارالیپ گل لر ، سولوب چیچک لیک

چمن یوخ داغلاردا ، اولوب گوونلیک

داشلارین اوستونده ، یاتا  بیلمیرم

 

اوخومور باغلاردا  دای گوزل بیر قوش

بلبلون یوواسی قالیپدی لاپ بوش

قارقادی قاریللیر ، زاریللیر بایغوش

قولاقا بو سسی ، آسا بیلمیرم

 

اولایدی کاش بیرده ، آتام دیریله

قاییدایدیم منده ، او گئدن ایله

بیر مَلَر قوزو تک ، گَلَردیم دیله

دییه ردیم اونو که  ، یازا بیلمیرم

 

توتاردیم الیندن قویمازدیم گئده

عمریمین ایللرین ، بهارسیز ائده

فلکین الینن    توکومو     دِئده

قالمیشام سویوخدا ، قاچا بیلمیرم

 

سنّن اولان گونلر یادیما دوشور

سنین اولماماغین بئلیمی بوکور

شیرین خاطیره لر ذهنیمی سوکور

او گوزَل ایشلرین ، سایا بیلمیرم

 

قابارتدین اللرین درد و محنتده

بویوتدون منی چوخ ، ناز و نعمتده

اوزومه گولدون ، سن هر مشقّتده

دای سنسیز دونیادا ، قالا بیلمیرم

 

قاتمادین چوره گن ، بیرتیکه حارام

دیمه دین همیشه دونیادا وارام

بورجومو قونشویا صاباح آپارام

بوگونو صاباحا ، آتا بیلمیرم

 

قلتوقا گَلَنده ، هر ایلده آیدا

"کور بلاغ " اوستونده قالارام وایدا

دره دوز بو تایدا ، اوزون اوتایدا

دای سن سیز بوتایا چیخا بیلمیرم

 

او باغین زینتی گیتدی سنیلن

حرمتی  عزّتی گیتدی سنیلن

سبزه سی کولگه سی گیتدی سنیلن

کولگه لی بیر آغاج تاپا بیلمیرم

 

باغین گوزه للیگی سنیلَنیمیش

اریگی آلماسی ، الینَنیمیش

بوللوغو چوخلوقو ، قلبینَنیمیش

گینه او اوره کدَن اولا ؟ بیلمیرم

 

 قورویوب  گاهوار ، اکدیگین آغاجلار

داغیلیب یونجایا ، ییقدیقین داشلار

دای قدیم لر کیمین ، قوهوم قارداشلار

سفراسین  اوردا     آچا بیلمیرم  

 

 دره دوزون دامی ، چایلی اوجاغی

سن دَملییَن چایی آخشامین چاغی

سرین کولگه سینده ، دامین قاباغی

او دادلیقیندا چای ، دادا بیلمیرم

 

چیخارداندا   یرآلمانی  سوغانی

دولدورادیق تَلیسلری  دولانی

یتیشَنده چوره ک ییمَک زامانی

یرآلمایدی کباب !!! یادا بیلمیرم

 

اکمیشیدین راجیلاری دوزه دوز

آییرمیشدین وریانلاری گوزه گوز

جورلَمیشدین بهشت ، آدی دره دوز

امّا حییف ایندی داها بیلمیرم

 

کندیمیزده واردی گوزَل باغچالار

صاحبینه مثل بهشتدی اونلار

فخر ائدَریک اولّارا بیز قونشولار

هامّیسینا غیر از  " یاشا " بیلمیرم     

 تابستان 1394 - بلباسی

 عشق اولسون تمام حرمتلی اوخویانلارا - نظرلریزه گوره چوخ خوشحال اولارام